തിരുവനന്തപുരം: കെഎസ്ആർടിസിയുടെ പ്രിയദർശിനി പദ്ധതിയിലൂടെ ഏകദേശം 60 കോടി രൂപയുടെ നഷ്ടമുണ്ടായെങ്കിലും അത് സർക്കാർ നേരത്തേ കണക്കുകൂട്ടിയിരുന്ന കാര്യമാണെന്ന് ഗതാഗത വകുപ്പ് മന്ത്രി സി.പി. ജോൺ പറഞ്ഞു. മുഖ്യമന്ത്രി ധനകാര്യ മന്ത്രിയുടെ ചുമതലയും വഹിക്കുന്നതിനാൽ സാമ്പത്തിക കാര്യങ്ങൾ കൃത്യമായാണ് കൈകാര്യം ചെയ്തതെന്നും മന്ത്രി വ്യക്തമാക്കി.
പ്രിയദർശിനി സർവീസുകൾ കൂടുതൽ വ്യാപിപ്പിക്കണമെന്നാണ് സർക്കാരിന്റെ ലക്ഷ്യമെങ്കിലും നിലവിൽ ആവശ്യത്തിന് ബസുകൾ ലഭ്യമല്ലെന്ന് മന്ത്രി പറഞ്ഞു. എംഎൽഎമാരുടെ വികസന ഫണ്ടിൽ നിന്ന് ഓരോ ബസ് വീതം വാങ്ങുന്ന രീതിയിലേക്ക് നീങ്ങുന്ന നിയമനിർമാണം പരിഗണനയിലുണ്ടെന്നും അദ്ദേഹം അറിയിച്ചു.
എക്സ്പ്രസ്, ഫാസ്റ്റ് പാസഞ്ചർ ഉൾപ്പെടെയുള്ള സർവീസുകളും ഘട്ടംഘട്ടമായി പ്രിയദർശിനി പദ്ധതിയുടെ ഭാഗമാക്കാനാണ് ആഗ്രഹമെന്നും എന്നാൽ നിലവിലെ സാഹചര്യത്തിൽ അതിന് പരിമിതികളുണ്ടെന്നും മന്ത്രി പറഞ്ഞു.
ഓൺലൈൻ ടാക്സി ഡ്രൈവർമാരുടെ സമരവുമായി ബന്ധപ്പെട്ട ചോദ്യത്തിന്, വാഹന മേഖലയിലാകെ വൻതോതിൽ നിക്ഷേപമുണ്ടെന്നും ആ മേഖലയിലെ തൊഴിലാളികളുടെ ആശങ്കകൾ സർക്കാർ ഗൗരവത്തോടെ പരിഗണിക്കുമെന്നും സി.പി. ജോൺ വ്യക്തമാക്കി. വിവിധ മേഖലകളിൽ പ്രവർത്തിക്കുന്നവരെ പ്രോത്സാഹിപ്പിക്കുന്ന നടപടികൾ തുടരുമെന്നും അദ്ദേഹം കൂട്ടിച്ചേർത്തു.
ലക്സ്വറി ബസുകൾ ഉടൻ സർവീസ് ആരംഭിക്കുമെന്നും എന്നാൽ വലിയ തോതിൽ പുതിയ ബസുകൾ വാങ്ങുക എന്നത് സർക്കാരിന്റെ നയമല്ലെന്നും മന്ത്രി പറഞ്ഞു. നിലവിലുള്ള ബസുകൾ പരമാവധി കാര്യക്ഷമമായി നിരത്തിലിറക്കാനാണ് മുൻഗണനയെന്നും അദ്ദേഹം വ്യക്തമാക്കി.
സംസ്ഥാനത്ത് പുതിയ റോഡ് സുരക്ഷാ യജ്ഞത്തിന് തുടക്കമിടുമെന്നും ഇതിന്റെ ഭാഗമായി റോഡുകളിലെ സീബ്രാ ലൈനുകളുടെ വീതി ഇരട്ടിയാക്കുന്ന നടപടികൾ സ്വീകരിക്കുമെന്നും മന്ത്രി അറിയിച്ചു.