ചമൽ : സിപിഐഎം ചുണ്ടൻകുഴി ബ്രാഞ്ചിന്റെ ആഭിമുഖ്യത്തിൽ എസ്.എസ്.എൽ.സി., പ്ലസ് ടു, എൽ.എസ്.എസ്. പരീക്ഷകളിൽ ഉന്നത വിജയം നേടിയ വിദ്യാർഥികളെയും വിദ്യാഭ്യാസ, ചലച്ചിത്ര, സംഗീത മേഖലകളിൽ മികവ് തെളിയിച്ച പ്രദേശത്തെ പ്രതിഭകളെയും അനുമോദിച്ചു.
ചുണ്ടൻകുഴിയിൽ സംഘടിപ്പിച്ച ചടങ്ങ് ശ്രദ്ധേയമായ ജനപങ്കാളിത്തത്തോടെയാണ് നടന്നത്.
എസ്.എസ്.എൽ.സി., പ്ലസ് ടു, എൽ.എസ്.എസ്. പരീക്ഷകളിൽ ഉന്നത വിജയം നേടിയ മുഴുവൻ വിദ്യാർഥികൾക്കും ചടങ്ങിൽ മെമന്റോ നൽകി ആദരിച്ചു. പഠനരംഗത്ത് മികച്ച നേട്ടം കൈവരിച്ച വിദ്യാർഥികളെ സമൂഹത്തിന് മാതൃകയാക്കുകയും കൂടുതൽ ഉയരങ്ങൾ കീഴടക്കാൻ പ്രോത്സാഹിപ്പിക്കുകയും ചെയ്യുക എന്ന ലക്ഷ്യത്തോടെയായിരുന്നു അനുമോദന പരിപാടി.
ചടങ്ങിൽ മലയാള സിനിമയായ 'വാഴ 2'-ൽ മികച്ച പ്രകടനം കാഴ്ചവെച്ച് ശ്രദ്ധ നേടിയ ബാലതാരങ്ങളായ അനന്ദു, അഭിമന്യു എന്നിവരെയും, ബി.ഡി.എസ്. പഠനം വിജയകരമായി പൂർത്തിയാക്കി ഡോക്ടറായ ഡോ. തീർത്ഥ ഉണ്ണി, അഖില കേരള വയലാർ സിനിമാഗാനാലാപന മത്സരത്തിൽ സ്പെഷ്യൽ ജൂറി അവാർഡ് നേടിയ സതീഷ്കുമാർ പ്ലാത്തോട്ടം, ബി.എഡ്. പരീക്ഷയിൽ ഉന്നത വിജയം നേടിയ അക്ബർ അലി എന്നിവരെയും മെമന്റോ നൽകി ആദരിച്ചു.
ഏഴാം വാർഡ് മെമ്പർ കെ.സി ലെനിൻ ചടങ്ങിൽ അധ്യക്ഷത വഹിച്ചു.
സിപിഐഎം ലോക്കൽ സെക്രട്ടറി കെ.ആർ. ബിജു ഉദ്ഘാടനം നിർവഹിച്ചു. വിദ്യാഭ്യാസം, കല, സംസ്കാരം തുടങ്ങി വിവിധ മേഖലകളിൽ മികവ് തെളിയിക്കുന്നവരെ ആദരിക്കുന്നത് സമൂഹത്തിന് പ്രചോദനമാകുന്ന മാതൃകാപരമായ പ്രവർത്തനമാണെന്ന് അദ്ദേഹം പറഞ്ഞു.
ഡി.വൈ.എഫ്.ഐ ബ്ലോക്ക് പ്രസിഡന്റ് അഖിൽ, ബേബി രവീന്ദ്രൻ, ബ്രാഞ്ച് സെക്രട്ടറി രതീഷ് എന്നിവർ ആശംസകൾ നേർന്ന് സംസാരിച്ചു.
ഹാസിഫ് സ്വാഗതവും ഷാഹുൽ നന്ദിയും പറഞ്ഞു
.